Bus4u hlaut viðurkenningu Vakans

Hópferðafyrirtækið Bus4u hlaut á dögunum vottun Vakans sem er virt  gæða- og umhverfisvottun fyrir íslenska ferðaþjónustu. Markmiðið með Vakanum er að efla gæði og öryggi í ferðaþjónustu á Íslandi með handleiðslu og stuðningi, ásamt því að byggja upp samfélagslega ábyrgð ferðaþjónustufyrirtækja. Bus4u er staðsett í Reykjanesbæ og á um 18 ár að baki í ferðaþjónustu og farþegaflutingum.

Verkefninu er stýrt af Ferðamálastofu. Þau fyrirtæki sem taka þátt fá óháðan þriðja aðila til að skoða og taka út starfsemi og þjónustu fyrirtækisins, fá staðfestingu á því sem vel er gert og tækifæri til að bæta það sem betur má fara. 

Allar starfsstöðar Bláa Lónsins hafa hlotið þessa viðurkenningu en Bus4u bætist nú í þeirra raðir sem fulltrúar Reykjaness í Vakanum.