Bókasafn Reykjanesbæjar er staðsett við Tjarnargötu 12 þar sem Ráðhús Reykjanesbæjar er einnig til húsa.
Safnið er opið alla virka daga frá klukkan 09.00 til 18.00 og frá klukkan 11:00 til 16:00 á laugardögum yfir vetrartímann. Bókasafnið er lokað á laugardögum yfir sumarmánuðina (júní, júlí og ágúst).
Á efri hæð safnsins er að finna afgreiðslu, skáldsögur, ævisögur, barnahorn, tímarit og fleira sem kallar á meiri samskipti.
Á neðri hæð safnsins eru lestrarsalir, upplýsingaþjónusta, heimavinnuaðstaða og fleira sem krefst kyrrðar og rósemdar.
Á safninu er þráðlaust net og hægt er að komast í tölvu.
Upplýsingaþjónusta: http://sofn.reykjanesbaer.is/bokasafn/thjonusta/upplysingathjonusta
Bókasafn Reykjanesbæjar er menningarmiðja bæjarins. Markmið safnsins er að veita íbúum aðgang að fjölbreyttum safnkosti og upplýsingum á mismunandi formi. Safnið stuðlar að eflingu menningar- og vísindastarfsemi, menntunar, símenntunar, atvinnulífs, íslenskrar tungu, ánægjulesturs og upplýsingalæsis. Bókasafnið á að vera hlutlaus staður, „þriðji staðurinn“ á eftir heimili, vinnu eða skóla.
Öll börn í Reykjanesbæ fá frítt lánþegaskírteini til 18 ára aldurs.
Starfsfólk Bókasafns Reykjanesbæjar stendur fyrir viðburðum af ýmsu tagi og má nefna að á safninu er leshringur, skapandi samvera þar sem lögð er áhersla á margs konar handavinnu, notalegar samverustundir fyrir fjölskyldur með ung börn þar sem lesið er úr barnabókum. Heimskonur hittast einnig einu sinni í mánuði en þá koma saman konur af ólíkum uppruna og ræða málin.
Í Bókasafni Reykjanesbæjar er vilji starfsfólks sá að hér sé einskonar gátt inn í samfélagið eða staður sem er eins og vin í eyðimörkinni þar sem allir ættu að finna eitthvað við sitt hæfi.
